بسم الله الرحمن الرحيم
قصيدة منقولة للشاعرة بدرية ابراهيم الاشهب عن المراة الليبية اعجبتنى فنقلتها لكم ارجو ان تنال الاعضاء وشكرا
لا تقول أحضرية وغيرت .. عاداتها
فيا البداوة أصل .. ومفاعيل
أنا بنت هاذي الأرض من .. طياتها
أنا من مطرها وعشبها .. والسيل
أنا من دماً سالت على .. جالاتها
نايات تجري في عروق .. الجيل
أنا من بَحَرْها ومن شجر .. غاباتها
من كل واحة وارفة .. بنخيل
أنا من سواحلها وهوا .. جناناتها
أنا م الرتم والطلح .. والقصيل
أنا من قرى متوسدة .. طيباتها
ف ظل المحبة عاشقة .. لمقيل
أنا من صحاري غازلة .. ذراتها
ثياب لانبياء وساحة .. التنزيل
أنا من أجبال أحقافها .. ثكناتها
لنار المعارك شاعلة .. الفتيل
أنا من نفس أمي وصوت .. رحاتها
وبكيت هجاويها عقاب .. الليل
وغناوة (الجباد) في .. حوشاتها
اللي جابت مخاوير أسمرة .. و النيل
أنا من عباه رحلن .. سداياتها
وتبقى العبا رمز لتراث .. أصيل
أنا بنت هاللي في (العقيلة) .. امباتها
ورا من (شبردق) ناظرات .. الويل
بنت السمايا وفقد .. فزاعاتها
اللي يخلن براريم النعال .. دقيل
باستشهادها تشري سنين .. حياتها
عليهن حكي (بوحويش) .. بالتفصيل
أنا (مبروكة العلاقية) في .. صولاتها
فوق من اللي انشال الثقيل .. يشيل
أنا الفخر منقوش في .. ركاباتها
وين همزت طارت تقول .. هميل
أنا (مبروكة) أخت عيسى لابسة خلاطاتها
الوكواك .. فزعتها نهار .. الشيل
قدام قاضي ايطاليا .. وقفاتها
تاريخ لصبايا مالهنش .. مثيل
و(فاطمة عثمان) من .. نظراتها
تنبت قصايد رافضة .. التنكيل
ونا (مريم الحجلا) ف عقلها .. وثباتها
وين ردت على (البنكة) وهالت .. هيل
و(خديجة الجهمي) في المسا حكاياتها
يسرن كما سروة نسيم .. عليل
عيشة المزوغية .. وحزن .. مرثياتها
اشعار فوق من خد المسا .. أتسيل
وين ما حكت عن فقد .. وداداتها
تاريت قزون الكبيرهبيل
أنا الأم هاللي فاردة .. جناحاتها
علي عشها يوم فقد .. بوكمبيل
الصيت والعَصَر والصبر هن غاياتها
جبينها يستاهل .. التقبيل
انأ الليالي لو بخت .. نجماتها
يضون الليبيات كيف .. سهيل
أنا كتب للتاريخ في .. صفحاتها
نساء لابسات عقود .. وأكاليل
أنا كتب للتاريخ من .. صفحاتها
يطل الضياء واطيور .. أبابيل
أنا ليبيا أنا عزها .. وراياتها
مزروع في دمي صهيل .. الخيل
لا تقول أحضرية وغيرت .. عاداتها
فيا البداوة أصل .. ومفاعيل
الشاعرة بدرية الاشهب وقصيدة الفخر
